កំឡុងជម្លោះប្រដាប់អាវុធកម្ពុជា-ថៃ ទីតាំងរាប់រយនៅលើ Google Maps ត្រូវបានរំលោភបំពាន ធ្វើឱ្យប៉ះពាល់ដល់កេរ្តិ៍ឈ្មោះទេសចរណ៍របស់ប្រទេសកម្ពុជា

កាលពីថ្ងៃទី៦ ខែកញ្ញា ឆ្នាំ២០២៥ Cambodia Local Guides Connect ដែលជាសហគមន៍អ្នកបញ្ចូលទិន្នន័យទីតាំងផែនទី Google បានចេញផ្សាយរបាយការណ៍ស៊ើបអង្កេតរបស់ខ្លួន ដោយបានរកឃើញពីការយាយីជាប្រព័ន្ធដែលកំណត់គោលដៅលើប្រទេសកម្ពុជា តាមរយៈការកែប្រែទីតាំងនៅលើ Google Maps។ ការរំលោភបំពាននេះ បានប៉ះពាល់ដល់អធិបតេយ្យភាពឌីជីថល កេរ្តិ៍ឈ្មោះទេសចរណ៍ និងសុវត្ថិភាពសហគមន៍របស់ប្រទេសកម្ពុជា។ របាយការណ៍កម្រាស់ ៣៣ទំព័រ Cambodia Local Guides បានកត់សម្គាល់ថា កំឡុងជម្លោះព្រំដែនរវាងប្រទេសកម្ពុជា និងថៃ កាលពីចុងខែមិថុនា មានសកម្មភាពមិនប្រក្រតីមួយចំនួននៅលើ Google Maps ដូចជាមានទីតាំងថ្មីៗបានលេចឡើងជាភាសាថៃនៅលើទឹកដីកម្ពុជា ដែលមានខ្លឹមសារប្រមាថមើលងាយ និងកំណត់គោលដៅលើឥស្សរជនជាន់ខ្ពស់កម្ពុជាជាដើម។ ពេលវេលា និងលំនាំទាំងនេះបានបង្ហាញថា បញ្ហាដែលកើតឡើង មិនមែនជាឧប្បត្តិហេតុចៃដន្យនោះទេ ប៉ុន្តែវាជាសកម្មភាពឌីជីថលដែលមានការរៀបចំទុក ភ្ជាប់ទៅនឹងជម្លោះព្រំដែនដែលកំពុងមានជម្លោះជាក់ស្តែង។